بودعك قبل الوداع بسنين..

يامليحة القول والفعال ياطاهرة الشفتين

بمسك فى ديل جلبيتك وابكى

رجليا رجل فى جنتك ورجل فى شكي ..

بمسك فى ديل جلبيتك وانوح

بحب لكن لا فؤاد ولا روح

لما اليتيم يعانق المجروح يقع القمر نصين

ياوادعة ياطاهرة الشفتين

قطر الصباح قبل الصباح جانى

ولما جانى الصبح قطر الصباح كان صوته عدانى

كان صوته ابعد صورة فى ودانى

قعدت اشرب على الرصيف وانعى

وتدوس رجول الناس على دمعى

وطعم شفتينك مرار اليتم

ومن بعيد كانت بيوت الناس متكومة

تحت النخيل والصبر ..

وانا على الرصيف الصخر وحدانى

بدارى بايدى عورتى وانعى

وتدوس رجول الناس على دمعى

جوه الطعام طعمين .. جوه الشراب شرابين

دلوقتى بوستك بوسة ولا اتنين

دلوقتى انتى واحدة ولا اتنين

كل الحاجات دلوقتى لها طعمين

وفى كل شيء شيء .. كل شيء إتنين