البنت ماشية من زمان تتمخطر
والغفله زراعه في الديوان زرع اخضر
تشوف حبيبها فى الجاكته الكاكى
والسته خيل والقمشجى الملاكى
تسمع قولتها …. ياوراكى
والعافية هبله والجدع متشطر
الوزة من قبل الفرح مدبوحة
والعطفة من قبل النظام مفتوحة
والديك بيدن والهانم مسطوحة
تقرأ الحوادث فى جريدة كتر
ياراكب الفيتون وقلبك حامي
حود على القبة وسوق قدامي
تلقى العروسة شبه محمل شامي
وأبوها يشبه في الشوارب عنتر
وحط زهر الفل فوقها وفوقك
وجيب لها شبشب يكون على ذوقك
ونزل النونو القديم من طوقك
ينزل فى طوعك لا الولد يتكبر
دا ياما مزع كل بدلة وبدلة
وياما شمع بالقطان والفتلة
ولما جه الامر الكريم بالدخلة
قلنا اسكتوا خلو البنات تتستر
نهايته يمكن ربنا يوفقكم
مادام حفظية الماشطه بتزوقكم
دي سكره مالطى داهية ماتفوقكم
بس ابقى سيبك م اللى فات ده مقدر
مرمر زماني يازماني مرمر