ما تمضغيش للعيال الأكل باسنانك

والنفخ في الأكل سم في عرض أيمانك

مره جهوله حمارة ، خصلتك سودة

ماتسمعيش الكلام ، تنشكى فى لسانك

– إن عيط الواد وقالك اشتري نعناع

وحمصية ونبوت الغفير وبتاع

اوعك تطاوعي كلامه واعملي طرشة

ده السقم والسم أصله من إيد البياع

وإن قدر الله وكان عندك ولد عيان

ما تحطيهوش بين اخواته دا العيا دفان

و ابقى اعملى زى ما يقولك عليه الدكتور

و تمنعيه من الطبيخ و ترتبى اللبان

شيلى يا بنت الحلال الإبرة من المسند

ليتكسر سنها فى إيد الولد أسعد

تملى ترمى الإبر ، ماتحرميش أبدا

مش فاكرة من يوم ما شكت خُربة أم أحمد

و إن كان في بيتك شوك و لا معالق بقص

خافى عليهم ليبقوا كل يوم فى نقص

واغلي لهم المية لما تغسلي المواعين

ونضفي البيت وخلي الأوضة ترقص رقص

وبطلي قولة العفاريت والغولة

لا يطلع الواد عبيط والبت مهبولة

ماتعرفيش الكلام ده يتلف الأولاد

و يفرجوكى المرار و تعيشى مخبولة

حاتعملوا ازاى لما تصبحوا عيله

و انتم بتاخدوا الجنيه بتفرقعوه فى ليله

دا بالكى كان مره بعد الشر مش قادر

مفيش بقى إلا الموبيليا ، شوفتى دى الميله