حايفوت أغسطس وسبتمبر وجاى خريف
يقصف فروع الشجر ، لما يهب عنيف
والكون يلفه الظلام ، والريح صفيرها مخيف
وأنتم يا أطفال حيارى من رصيف لرصيف .
والشمس تطلع عليكم بالدفـا والنور
وتدوروا متفرقين زى القضا ما يـدور
أو تمسوا متربطين آخر النهار فى طابور
تجره كبشة عساكر بالحبال الليف
فى كل روضة الطفولة خدها ينباس
وأنتم خدودكم على سفح التراب تنداس
فايتاكم الناس همل … وأنتم ولاد الناس
تتربوا من غير معلم ، أو بدون مصاريف !!
ومين يا أطفـال يتكفل لكم بطعـام
أستغفر الله نسيت …. الدنيا فيها كرام
فى كل عيد أو مناسبة يطعموا الأيتام
من مطعم الشعب ينفح كل طفل رغيف
من قبل ماتزخرفوا وتزينوا الميادين
صونوا الطفولة اللى صانوها اللى مالهم دين
والطفل على الأرض يطفى لمعـة النياشين
وبقعة تمسح جمالك يام باندانتيف !!