منصورة يا (مصر) مش بجميلة العسكر

احنا اللى روَّحنا بدري… بس… مش أكتر

قول للّى روَّح عشان يرتاح فما ارتاحشي

الراحة… كلِّ ما تستعجلها… تِتْأخَّر !!

واللي هاينزل هايُحكُم لو ما روَّحشي

… قصر الرياسة بْبلاش، بسِّ انتَ مستخسر

قصر الرياسة مفيش بينك وبينه كتير

فيه سلك شائك وكيس رملة وكُشْكِ غفير

لو جيت لوحدك، هايضرب، والرّقاب هاتطير

وان رحت مليون، هايهرب، وانتَ تبقى أمير

رئيسنا واحد شهيد، يحكُم من التحرير

قصر الرياسة الجديد بـِصيـنِيَّة ومدوَّر

منصورة يا (مصر) بجميلة خيام الخيش

بيحرقوها عشان تمشي ولا تمشيش

يا (مصر) عُمْر ما ثورة تقوم بِـشْوِيش

المُلك ده اللي ادِّتيه للعسكري بقشيش

حقّ العيال اللي ماتوا في طابور العيش

وبنت عَرّوها فِ الشارع وشيخ أزهر

يا حاجّة ياللي قَِرت فِ الكفّ والفناجيل

اقري وشوش البشر، ع النصر تلقي دليل

ده حقنا فِ (مصر) مش هانسيبه للتساهيل

وان قلتِ نصبر يومين… يبقى هانصبر جيل !!

أجّلنا قبل كده… فادنا بإيه التأجيل ؟

رَمْيِ الجُثَثْ فِ الزبالة فِ الضُّحَى الاحمر ؟؟!!

منصورة يا (مصر) بجميلة ولاد وبنات

بجميلة اللي انحبس… بجميلة اللي مات

بجميلة التّريَقَة والضحك فِ الأَزَمات

ودم فوق الرصيف ناقش سُوَر وآيات

يا (مصر) ياللي انتصرتِ ف جُمعِتين وِتَلات

نفس العَدُو… هُوَّه هُوَّه… بَسِّ متنكَّر

الصبح طالع… لِقِي دبابة فوق راسُه !!

مربَّعة فوق دماغُه وكاتمة أنفاسُه

والشرق مقفول… خِتْمِ النِّسر ترباسُه

قام خبَّا شمسُه ووزَّعها على ناسُه

على العيال اللي ماتوا غدر وانداسوا

بقى شرق فِ كل جسم، وشمس بتنوَّر

الشعب واقف… وصدره للرصاص عريان

والدولة خايفة ولافَّة نفسها ف جدران

وزي ما الحاوي ممكن يلدغُه التعبان

شوفوا حيطان السجون بتلفّ عَ السّجان

والفالح اللي اتهوَّر - بَسِّ - عَ النّسوان

ما شُفناهوش ع الحدود يعني… يا ناس بيتهوَّر…

كان للفراعنة إله… قرد وإله تمساح…

وللإله كهنة، وعسكر يقف بسلاح

وخزنة متقفِّلة بالضبة والمفتاح

وقصر يشبه قصور الجمهورية براح

يا عيني ع الآلهة… بقوا فرجة للسياح…

ياللي بنسر وسيفين… فرحان ومتكبَّر !!

الشمس تُدعى الغزالة في اللغة، فاعلم

وبالغزالة المضيئة فِ السما باحلم

غزالة ممكن تبيِّن طبعها الوحشي

ما تغرّكمش الأسامي ورقـّة المبسم

دي شمس واللي يِقَيِّدها ما يفلحشي

ومصر حالفة… هاتتحرّر… هاتتحرّر…