جايه عـروس الشـعر م البـغـالة
بمـلايـة لـف وكـف مـتـحـنـى
شـافت صـوان وحبـال وناس شغالة
وأنـا بـابـكى جنب البـاب ومستنى
والشـمـس تقـطر حزن ع الصبحية
ميـن اللى مـات يـا شب يابو دموع
قـالـت عروس الشـعر للمـوجـوع
مين اللى مات يا شب، قل لى يا خويا
قـالت عروس الشعر.. لا يكون ابويا
أنـا قـلـت ابـونا كلـنا يـا صبية
مات زى مـا كتـف الجـبل ينهد
مـات باقـتدار وفـخار مـاقالش لحد
بيـرم.. ومات ماشى ف طريق الجد
وجـنازتـه ماشية أهه في شارع السد
والنعـش عـايم في الدموع في عينيا
فـايت فـى قـلب القـاهرة ومـعدى
هـو عـارفها وهـى مـش عـارفاه
عـلى كـل حـاره وكل عطفة يهدى
كـأنـه راجـع لـسـه مـن منـفاه
بيبوس بعـيـنه اللِـبْـدَة والجلابيه
ده القـبـر ده.. والا كـمـان منـفى
طـالـع علـيه الشـوك والـحـلفا
ده الـقـبـر ده.. والا كـمان تَبعيده
حـدفـوه علـيـها كلمتين في قصيدة
بيـرم.. فتـحت ديـوانـه رد علـيا