بنتولد .. طاهرين
بنتولد .. شبعانين
بنتولد .. متلهفين
على صدر أم وكتف أب .. مرتاحين
بنتولد .. باكيين
بنتولد .. مش عارفين
بنتولد .. مش خايفين
وأسمنا فى درب الحياة .. بنى آدمين
بنتولد .. دفيانين
بنتولد .. صافيين
بنتولد .. صادقين
كما زرعة خضرا فى أرض طيب
زرعة حصادها حصاد عمر السنين
الحلو والمر والطيب والحزين
بنتولد .. مش داريين
بالرايحيين والجايين
نكبر وتكبر بينا أعمار السنين
ونكره السنين وتكرهنا السنين
ونجرح البشر ونجرح نفسنا .. مع أننا
بنتولد .. طاهرين
بنتولد .. شبعانين
بنتولد .. متلهفين
على صدر أم وكتف أب .. مرتاحين