اختار الجواب الصحيح من وجهة نظرك

واحسم أمرك

بدون غش وكدب وتزوير..

■ الفساد فى مصر وصل إلى:

• الركب

• منطقة أسفل القفا

• أبعد كتير من المناخير..

■ مجلس الشعب عبارة عن:

• قبة تحتها مفيش

• قبة تحتها كراسى

• قبة تحتها دكان عصير

■ مين اللى وضع المادة ٧٦:

• بكر الترزى

• ميكانيكى دستور مشهور ف عابدين

• عمل مشترك بين ميكى وسمير

■ كيف يتم اختيار عضو مجلس الشعب؟

• عن طريق الاتصال بـ ٠٩٠٠

• اللى يجمع أكبر عدد من أكياس البطاطس

• اللى قضى الخدمة العسكرية ف البلكونة

واتعلم ينط من ع المواسير..

■ المؤهلات المطلوبة لشغل وظيفة وزير:

• دمه خفيف وعنده رؤية مش واضحة

• عنده لاب توب وموبايل بكاميرا

• عنده ١٧ بدلة ماركات و١٦ كرافتة حرير..

■ كيف يتم إقالة الوزير؟

• يبعتوله رسالة ع الموبايل

• يقولوله روح اتطعم

• إزالة كشك الحراسة اللى قدام بيته مع سحب الغفير..

■ الهجوم على البرادعى يعتبر:

• أكل عيش

• قلة أدب

• التطور الطبيعى لأصوات الحمير..

■ مصر بتعمل إيه بفلوس الضرايب؟

• بترفع مستوى معيشة النصابين

• بتشرب بانجو وتلعب قمار

• بتدفع أتعاب المحامى وغرامات التأخير..

■ أزمة مباراة الجزائر فين؟

• عند بتاع الطرشى اللى ف القلعة

• فى قهوة المعلم سعد رزة

• فى قلب اللحاف القديم

اللى نايم تحت السرير..

■ العملية التعليمية فى مصر:

• تساعد على ارتفاع معدل البطالة

• تساعد على انتشار أمراض القلب

• تساهم بشكل ملموس

ف التهاب البواسير..

■ إحنا بنبنى الكبارى عشان:

• مصر تنام تحتها

• المواطن يرتاح عند نزلة الكوبرى

• ننقل الأزمة

من ٦ أكتوبر لميدان التحرير..

■ السؤال الأخير:

أكتب فى سطرين أو كلمتين

أو ما تيسر..

عن معنى كلمة جهة سيادية

ولو ف وسط الطريق

القلم نزف أو اتكسر..

إوعى تبطل غُنا