فؤاد حداد

مين قال

فؤاد حداد

الليله يا سمرا

البنت قالت فستاني

منشور على الشط التاني

خدني المراكبى و عدّني

و رجعت فى القَمَرَه

الليله يا سمره يا سماره

الليله يا سمره

الليل يصَبَّح و يمَسي

و تفكرينى و تنََسِّي

وافطم على ريقك نَفْسي

واتوب من الخمره

الليله يا سمره يا سماره

الليله يا سمره

العنجريب اللي قنيته

تَمَن سنين استنيته

على الجريد اللي بنيته

ح تزهّر التمره

الليله يا سمره يا سماره

الليله يا سمره

يا اللي صفيحتك بغوايش

عايش و لا لغيرك عايش

قلبي و لا البحر الطايش

عيني و لا الجمره

الليله يا سمره يا سماره

الليله يا سمره

أشرد من الظبي الشارد

و ارجع لارضك اتشاهد

و اقول يا وعد اللي يجاهد

على خيلك الضامره

الليله يا سمره يا سماره

الليله يا سمره

قال فينا غنوه و حدودته

قال ما فيناش قولة توته

ماهيش عجينه و ملتوته

كل القلوب حمرا

الليله يا سمره يا سماره

الليله يا سمره

خلّي الندى من احلامك

يسقي النبات من ايامك

حطّي اللي خلفك قدّامك

تلقى البلد عامره

الليله يا سمره يا سماره

الليله يا سمره

آخر الإضافات
أبيوسف
المقدمة intro

أبيوسف

عبد الرحيم منصور
ليالى المسا

عبد الرحيم منصور

مصطفي إبراهيم
حل مريح

مصطفي إبراهيم

عبد الرحيم منصور
لمين يا قمر

عبد الرحيم منصور

عبد الرحيم منصور
هو هو فى القلب جوة

عبد الرحيم منصور

[أبو الأنوار]
سكو سكو

[أبو الأنوار]