ضربت بجناحي الرياح صوتت
و مرقت زي السهم نحو النجوم
لجل الهوا الطلق الجميل
يخش صدري العليل
وينقي ريحي ريشي من تراب السفح
ملعون يا صيد المراعي
ما شفت فيك
غير الكلاب والأفاعي
ونا الجسور النفور
لا أحط ع الجيفه الموات ولا أدور
ولا يرضي عزمي وحسمي
صيد الفيران م الجحور
طبع الحادي غير طباع النسور
اللي انطلق ف الجو ويا الرياح
يعتل قلبه لو زحف ع الأرض
وما يستريح
غير لما يرجع للفضا عطشان
للدود مكان
وللجوارح مكان
علي أعلي قمه ف الجبل رفرفت
علي أعلي قمة ف الجبل حطيت
والله وحشني البيت
وكري فرشته بالشموخ والثبات
أسيبه طول النهاروأحن له في البياتلكن النهارده عجيب
رجعت قبل الشمس ليه ما تغيب طويل طويل ياعمر
عريض شقار ونقار وممدود سنين
لكن تهون ف الهوان
إذا الكواسر خواسر والديدان فايزين
وتكون محال
دنا رضعت الرفض من قمم الجبال أوصي يكون الكفن
بالكبرياء الجليل
ولا ينطلق صوت بالعويل
لكن في صمت حكيم
واللي اتولد وحده .. يموت وحده
يا طير على الأرض ماشي
رضيت تعيش في الجحور
لما عاشرت المواشي
و نسيت طباع الطيور
الشـاهد
أقر اني شفت عندالشروق
الشمس طالعه
واقر اني شفتها بتنزل
عند الغروب
لكن جريمة القتل ما شفتهاش
* سمعت إيه ..؟
سمعت موج البحر بيزمجر
علي بعد مليون ميل
لكني ما سمعتش صريخ الضحية
برغم قربي من مكان الحادث * أيوه أنا شفت النجوم بالليل
وكان ما بينهم نجمة حمرا بترتعش
لكني ما اتذكرش وجه القاتل
مع إنه فات
من جنبي واتبادل معايا الكلام * كان شكله إيه؟
طويل قوي وقصير
وتخين رفيع اسمراني واشقر
لا له حدود مميزة
ولا شكل ثابت * ما دام في كل قضية يلزمكم
قاتل ومقتول وشاهد
ممكن قوي
أكون أنا القاتل أوالمقتول
لكن بلاش أشهد وأقول الحق * يا بيه في عرضك
ماليش أنا في التور ولا في الطحين
طيب ح اقول
بس ابعدوا المخبرين * أنا شخص حالم مسالم
من صغر سني
والمشي وسط الشجر
هوايتي بالليل والنهار
وأول امبارح
قابلني واحد قال لي كلمة وطار
سألني ع الساعة وقبل ما أقول له
تركني واتوغل في قلب الغابة
وشكله كان
يشبه لشكل البيه وكيل النيابة * حاضر راح أخرس
أنا قلت م الأول ما شفتش حاجة
لكن بقي انتو اللي غصبتوا عليا
وخلتوني اقول * حصلت جريمة قتل وحشية
لكن ماليش فيها ذنب
أو مسئولية
يا تقيدوها بالقضاء والقدر
يا ضد مجهول
وان كنتوا عاوزين توصلوا للعدل
اللي سألني اجعلوه مسئول
* أنا لو افوت م المشكلة دي سليم
ح اقعد في كوخي
واقفل جميع البيبان
يحرم عليا السير ف أي مكان
هجم الخطرع الكون ومات لأمان
ومن علامات النهاية
ان اللي شفته قصاد عيوني بيقتل
هوه اللي بيحقق معايا