اسكنراني رماني ع الحياه مشحوف
وأي شيء يدهشك في روءيتي مالوف
وما عدش لازمة تدين زيد م البشر او عمرو
دا كل واحد بطاقته .. واللي فات معروف
مخالفة الرأي تصنع امتن البنيان
ان كانت القصد منها عزة الأوطان
وشعب مصر اللي قام زي الجمل بالعبء
خلاف عتبته ما تقصد وجهتي إنسان
وان كان طريقك طريقي احنا نبقي اخوات
وان كنت اخالفك ف رأيك نعقد الندوات
وكل واحد يقول اللي يريده بشرط
ممنوع في وقت المناقشه تهجم القوات!
النص ف الميه اصبح كالمسيح مصلوب
تبكي عليه الجرائد بالرثا المكتوب
بتقطع القلب ع الباشا اللي صار شحات
كانما الشعب غالب والبعيد مغلوب!
ما شفتش السل في ترحيلة الانفار
واللي بعيلته في غرفه من تلات أشبار
ومعدمين المكاتب اللي بين البين
الزيت في ياقة الجاكته يتعثر قنطار!
ما شفتش العامل اللي كل يوم مزهوق
يدخل جهنم من إمبابه لباب اللوق
ولسه علشان ما يوصل شغله في حلوان
يا القطر يأكله يا يفطس في الزحام مخنوق
دي الأغلبية اللي شاربه المر في الأكواز
واللي في وقت المعارك جهدها ممتاز
الفرد يقبض ماهيته تنهشه الأسعار
ما يلاقي في يوم تمانيه حق لتر الجاز
ورغم فقره الدكر والحمد له واليه
مطلوب كمان منه يبكي لجل شوكت بيه
م العذر سرب كلابه .. والقطط .. يا حرام
ارجع لأصلي السواحلي .. وللا اعمل ايه!!