ومصاحف طلت م الشبابيك
رجلين بتدبدب فوق السطح
وضوافر بتخربش في الشيش
صوت بنت بتصرخ وسط الليل
البيت اتهد
البيت اتهد
مسكينة البنت اللي اتقلت في الحارة السد
مسكينة البنت اللي اتردمت تحت الأنقاض
صابحة
أم التفاح ع الخد
ليلة دخلتها يا ضنايا
البيت اتهد
مسكينة البنت اللي اتردمت يوم فرحتها
* بيصرخ فالليل عفريتها
وبيرمي على الحي اللعنات
ملعون الحي اللي يكفن بترابه بنات
يوم دخلتهم
ملعون الحي
* ياشيخ معروف ياللي مقامك بالطوب الني
حيك قرفان
حيك جبانة قرفانة مليانة جتت
ومغطيه الدبان
جواريه و زقايقه جحور و عرس وقطط وفيران
* ياشيخ معروف حيك عجز
بيموت بالنااس اللي في قلبه
ولا حدش حاسس بيه
الهيلتون فوق النيل ومداري عليه
يا قمة فوق الجبل
ما تنكريش الجمايل
مهما ارتفاعك وصل
السفح هو اللي شايل
وحيد ومُعدَم وغير مدعوم ومش محسوب
وفي كشوف البطايق اسمي مش مكتوب
ولمّا يِحْصوا الشِلل ماجيش ف أي جروب
وحيد ومفرد لوحدي وآخر استقلال
واللي ماهوش منتمي لحاجة ياكل طوب
ربيت شنب ورسمت أنف ف قفايا
وسرت في وسط البلد مارش دير
لاحد لاحظ إن وشي ورايا
ولا حد صحح لى خطـوط السير
الحمام الحُر نوحُه للسلام
و السكوت موت
للي روحه في الكلام
و الكلام المُر بلسم
للي يعرف و اللي يفهم
و اللي يقرا و اللي يدرى
و اللي يِعلم في الآلام
لما عود القمح يِشْرَق في التراب
لما قرص الشمس يغرق في الضباب
لما تبقى الناس بتِسْرح
ماشية نايمة ف كل مطرح
مين يقول للشعب : صحصح لا تنام
الطريق الصح واضح واضح للعيون
و الزمن مهما يناطح بالغيوم
لسه في مليون حكاية
و العزيمة للنهاية
إحنا دايما البداية
لا الختام
الشجرة بتخضر
لو عشش فوق منها
عصفورة و عصفور
و الخد بيحمر
لو طافت فوق منه
شفايف
و القلب الخايف
يطمن
و يشوف النور
البحر البنور
بيهدهد
سماكاية بتحب
و العالم
إيد ناعمة و إيد خشنة
و جمعهم قلب
العالم
سماكاية
بتحب
في بحور النور
العشق زين
بس الهموم سباقة
و الشوف حديد
بس الغيوم خناقة
و الانتظار للوعد نار حراقة
إمتى تطول العيدان
دا من زمان مشتاق أنا
و الحلوة مش مشتاقة
و الذل شين
إن كان محدش ع الحقيقة عَثر
لا اللي ظبط نظمه و لا اللي نَثَر
حرام تعيش و تموت بدون فعل مدهش
لابد تنحت قبل موتك أثر
يا موتي يا مفخرة
و معجزة للورى
مريت بدون ما اشترك
في حفلة المسخرة