صوت قفلتك
لأخر سوسته ف الشنطه
صوت طبطبة ايدك
بالراحه ع الباك باك
فرافيت تذاكر سفر
قطّعّتها اونطه
سندة عينيك وايديك
ف الباص على الشباك
فيه حاجات كتير عايزاك
تفضل كده مسافر
ف طريق ملوش اخر
إكمنها حتموت
ف الرحله من غيرك
فيه حاجات كتير عايشا
خايفاك تبطلها
وحاجات كتير عايزاك
لاكن معطلها
إن إنتا مش عايز
جايز …
حاجات منها
حتعيش وتستناك
جايز حاجات تانيه
ف الزحمه راح تنساك
زي اللي راحوا زمان
حتبطل الدخان ؟
ولاعتك السخان
وسجايرك البوسطن
حيموتوا من غيرك
حتبطل الاحزان ؟
كشكولك المليان
بـقصايدك الجايه
حيعيش لمين غيرك ؟
جسمك حجزله مكان
بالعافيه جوه الكادر
ميت ايد على كتافك
ميت بصه على وشك
كل الحاجات حواليك
ف الكادر سانده عليك
لو جيت وشلْت اديك
الصورة تتفركش …
ضلك على الحيطه
كان خافي عنها النور
وطلّعها بتنغمش
كفك على السفره.
من غيره كان إزاي…
مفرشها يتكرمش ؟
بصمة صباع إيدك…
لسّاها ع الشبابيك
ميت ألف تفصيله.
ملهاش وجود غير بيك
وإنتا عليك تختار…
حتبدّي مين على مين ؟
وتبدّي إيه على إيه ؟
الجاي والجايين ؟
ولا اللي خدت عليه ؟
أصل الحياه للعلم
مفيهاش حاجات ببلاش
وعشان ماتصبح فيلم
وأصلا عشان تتعاش
كادر الحياه المشحون
فرح والم وشجون
لازم يكون …بيلف
لازم يكون…. بيدور
يتقل عليك ويخف
ويعشّمك بالنور
ف نهاية المشوار
وأنا قلبي لف و دار
ميت ألف ليل ونهار
نفسه ف فرحه كادوه
وحلاوه من غير نار
ومّا الزمن تعبه
قصقص شريط الفيلم
وخَد كادر كان عاجب
وقرر يعيش ف الحلم
و الحلم كان كامل
جدا تمام خالص
ولجل الكمال لله
كل الحاجات جواه
لاكن في شيء ناقص
فاضي بشكل غريب
إيه اللي سبته هناك؟
ف تلاقي ف الكراكيب.
صورة القمر وياك
متشاله ف الكشكول.
باصه ف عينيك علطول
وكأنها بتقول ….
بالذمه مش واحشاك ؟!!
