انا و انتى عشنا سوا…
أيام يمكن ما تتعوضش من تانى..
شفنا التاريخ…و هو بيتكتب ع الهوا…
و سبنا الهوى يضربنا ف الخلاط…
معرفش بكتبلك من الإحباط…
ولّا الأمل…
معرفش إيه العمل….
ف ريحتك اللى مغرقة ورق النتيجة…
و ف الأيام المتعلّمة بمزيكا…
و ف الشال اللى شال دخنة و شياط و عياط
و فوارغ المطاط…
و الحى….و الدخان….
أكدب عليكى لو قلتلك ندمان..
لاكن انا عيّان بحب الوطن…
و بذكريات المعركة الدايرة…
و بخوفى م النسيان …
و بحُبِك إنتى كمان…