احمد فؤاد نجم
النيل عطشان يا صبايا
للحب والحنين
والشط
لانور
ولا نسمه
ولا ناي
ولا عود يا سمين
يا شاهنده وخبرينا
يا ام الصوت الحزين
يا ام العيون جناين
يرمح فيها الهجين
ايش لون سجن القناطر
ايش لون السجانين
ايش لون الصحبه معاكي
نّوار البساتين
كلك محابيس يا بلدنا
وهدومك
زنازين
وغيطانك الوسايع
ضاقت ع الفلاحين
والدخان في المداخن
لون هم الشغالين
احمد فؤاد نجم
شيلي البارود
حطي الوعود
والتعليلات
في المهملات
سفحوا الورود
من ع الخدود
والخضره
من قلب البنات
فين الأمان
جنب الغيلان
يا ملفقين
عصر التبات ؟
لا الجرح بات
ولا إتنسي
ولا التاريخ
والذكريات
احمد فؤاد نجم
يا ليل يا عين ما اعرفش اكدب
طب و اكدب ليه
عدم المؤاخذة
لنا باكتب
و لا أبصر إيه
لا انا احترافي اشتراكية
و لا عندي نزعة رجعيّة
احمد فؤاد نجم
بَستنظرك … رغم القساوة ف منظرك …
بَستنظرك … رغم الشتا … والبرد والرعد المخيف …
بَستنظرك … ف الشارع المشغول بأوحال الرصيف …
أنا أصلي حاسب موعدك … وعارف اللي بيبعدك …
وأنا اللي خابر تبقي مين … وأنا اللي صابر من سنين …
وبعدّلك بالثانية عمري واعدّلك … مطرح ف بستان الأمل …
وبَمدّلك وف كلّ خطوة أمدّ لك … ايدي اللي شققها العمل …
مدّي الخطاوي يا حبيبيتي … وقدّمي …
احمد فؤاد نجم
ناح النواح و النواحة
على بقرة حاحا النطاحة
و البقرة حلوب .. تحلب قنطار
لكن مسلوب .. من أهل الدار
و الدار بصحاب .. و حدعشر باب (11 باب )
غير السراديب .. و بحور الديب
و غيلان الدار .. واقفين بنهار
و ف يوم معلوم … عملوها الروم
زقوا الترباس … هِربوا الحراس
دخلوا الخواجات .. شفطوا اللبنات
و البقرة تنادي .. و تقول يا ولادي
و ولاد الشوم … رايحين ف النوم
احمد فؤاد نجم
يابلح ابريم يا سمارة
سواك الهوي ف العالي
هويت
على طمى النيل ياسمارة
وشربت عكار
لما استكفيت
بس احلويت قوي يا سمارة
لما اسمريت قوي ياسمارة
لفيت الشارع و الحارة
على زى نقاوتك فين
ما لقيت
يا حلاوة بنار